Мақолада радиода маданий-маърифий дастурларнинг ўзига хос хусусиятлари, уларнинг радиоэшиттириш тизимидаги ўрни, Ўзбекистондаги миллий радиоканаллар ва нодавлат радиостанциялар амалиётидаги маданий-маърифий миссиянинг ҳозирги даражаси ва самарадорлиги таҳлил қилинади. Илк бор маданий-маърифий дастурлар радиожурналистиканинг муҳим феномени сифатида ҳар томонлама тадқиқ қилинмоқда ҳамда уларни ташкил этиш ва олиб боришда журналистик маҳорат масалалари кенг қамровда ўрганилмоқда. Маҳаллий маданий ва маърифий радиоэшиттириш эволюциясини кузатиш асносида муаллиф унинг шаклланиши ва ривожланишидаги асосий босқичларни аниқлайди, глобаллашув ва тижоратлашув жараёнлари радионинг тарбиявий, таълимий, маданий ва маърифий функцияларига қандай таъсир этаётганини тадқиқ этади, радиоэшиттириш тизимидаги бозор рентабеллиги мезонларининг бадиий-эстетик ва ижтимоий-маърифий мезонларга нисбатан устунлигини кўрсатиб беради. Шўро даври ва мустақиллик давридаги республика радиоларида маданий-маърифий дастурларнинг қиёсий таҳлили мақолада ҳар икки давр маданият соҳасидаги давлат сиёсати нуқтаи назаридан амалга оширилади. Ўзининг кўп йиллик амалий тажрибасидан келиб чиқиб, муаллиф Ўзбекистондаги маданий ва маърифий эшиттиришларнинг асосий йўналишларини таҳлил қилади, радио журналистларининг маданиймаърифий вазифаларни амалга оширишга бўлган янгича ёндашувларини амалий мисоллар билан асослайди, анъанавий эшиттиришни янги медиа технологиялар билан самарали уйғунлаштириш усулларини таҳлил қилади. Тадқиқот учун эмпирик материал сифатида Ўзбекистоннинг давлат ва нодавлат каналларининг сўнгги ўн йил ичида эфирга узатилган жорий эшиттиришлар ва архив ёзувлари хизмат қилди. Мақолада жамиятда ижтимоий-маънавий муҳитни тарбиялашда республика радиостанцияларининг фаолиятида мавжуд муаммолар ҳам ўрганилади. Шунингдек, Ўзбекистонда радиоэшиттиришларнинг маданий ва маърифий миссиясини оптималлаштириш ва фаоллаштириш бўйича таклиф ва тавсиялар берилган.