Шаҳар мўйловдор қўнғизи (Aeolesthessarta (Solsky, 1871) Марказий Осиёнинг жанубий минтақалари бўйлаб кенг тарқалган ва у кенг озуқа спектрига эга бўлган тур сифатида манзарали ҳамда мевали дарахтларнинг хавфли зараркунандаларидан бири саналади. Шаҳар мўйловдор қўнғизининг тарқалиши, зарар келтириши ҳамда қарши кураш чораларига бағишланган ишлар олиб борилган бўлсада, унинг Фарғона водийси шароитида биологияси ва ҳаёт цикли кенг қамровли ўрганилмаган. Шаҳар мўйловдори ўзига хос бўлиб мазкур қўнғизлар бошқа ҳашаротлар каби кўпайиш, ривожланиш ва озиқланиш жойларини танлаш хусусиятига эга. Мўйловдор қўнғизлари мартнинг иккинчи декадасида жуфтлашади ва апрелнинг кейинги ўн кунликда тухумларини қўя бошлайди. Жуфтлашиш асосан тунда қуёш ботгандан сўнг фаол амалга ошади. Энг фаол ҳаракати туннинг соат 1900-2200 ларга тўғри келади. Тухумларини ривожланишидаги энг муҳим омил бу намлик ва ҳарорат ҳисобланади. Шунинг учун уларнинг тухумлари дарахтнинг пўстлоқ ва камбий оралиғида ривожланади. Тухумлари етила бошлаши билан уларда оқиш ранг нисбатан қорамтир рангга киради. Апрелнинг охири майнинг бошларида тухумдан чиққан қуртлари октябр ойининг то учинчи ўн кунлигигача фаол озиқланади ва қурт ҳолида қишлаб қолади. Ўсимлик танасига асосан қуртлик фазасида кучли зарар келтиради. Мўйловдор қўнғизлар билан зарарланган дарахт таналари қурилишга яроқсиз ҳолатга келади. Айниқса, юмшоқ танали дарахтлар мўйловдорлар томонидан кўпроқ зарар кўради. Масалан, чинорнинг кучли зарарланган 1 метр танасида 30 тадан 50 тагача тешиклар топилган бўлса (29.12.2008, Фарғона), теракларда бу кўрсаткич 200 га яқинни ташкил этади (18.01.2009, Ўзбекистон тумани). Зараркунанда туфайли дарахтлар шоҳларининг синиши чинорга қараганда бошқа оила вакиллар кўпроқ рўй бериши аниқланди. Узунмўйлов қўнғизларга қарши кураш усулларини ишлаб чиқишда уларни майнинг иккинчи ярмидаги ривожланиш фазалари, учиш муддатлари ҳамда куннинг қуёш ботиш вақтидаги фаоллигини ҳисобга олиш мақсадга мувофиқдир.