Ушбу мақолада газламанинг шакл ҳосил қилиш ва шакл ушлаш хусусиятлари газламалар юза зичликлари ва ғовакликларига боғлиқлиги ўрганиб чиқилди. Материалларнинг шакл ҳосил қилиш даражаси кўрсаткичларини тадқиқ қилиш орқали, газламалар ва трикотаж матолари учун ғоваклилик даражасини ҳисоблаш формуласи асослаб берилди. Маълумки, газламалар ишлаб чиқариш жараёнида турли кучлар таъсирида бир қатор ўзгаришларга дуч келади. Бу ўзгаришлар тўқув ёки бошқа ишлов бериш дастгоҳларидан газлама олиниб, ундан маҳсулот тикилгандан сўнг ҳамда маҳсулотларнинг истеъмол даврида қисман бартараф этилади. Шунингдек, кийим баданга кийиб юрилган вақтда унга даврий равишда алмашиб турувчи кучлар таъсиридаги тортилишлар ва кучдан холи бўлган даврлар тикилган маҳсулот структурасига таъсир этиб боради. Бунинг натижасида маҳсулот алоҳида қисмларининг шакл ўзгариши юз бериши мумкин. Бу, албатта, маҳсулот ташқи кўринишига салбий таъсир кўрсатади. Маҳсулот ташқи кўринишининг ўзгариши газламанинг хомашё таркиби, ўрилиши тури, тўқима тузилиш фазаси, иплар ўртасидаги ишқаланиш ва чирмашиш кучлари, якуний натижада эса маҳсулотнинг шакл сақлаш хусусиятига боғлиқ. Жун-ипак газламада шакл ўзгаришдаги кучланиш ҳолати тадқиқ этилиб, эгилувчан қисмда шакл ўзгариш кўрсаткичи чегараси 64-70% эканлиги назарий асосланди ва тажрибада тасдиқланди.