Бугунги кунда Республикамизда қишлоқ хўжалиги соҳасида кенг миқёсда олиб борилаётган кенг ислоҳотлар натижасида янги деҳқончилик тизими вужудга келди. Натижада ғўза якка ҳокимлигига барҳам берилиб, ғалла-ғўза, ғалла-ғўза-ем-хашак, ғалла-ғўза-сабзавот каби экинларни алмашлаб ва навбатлаб экиш тартиблари кириб келди. Натижада Республикамизнинг тупроқ иқлим шароитларини ҳисобга олиб кузги буғдойдан юқори ва сифатли ҳосил етиштиршда мақбул экиш муддатлари ва меъёрлари, озуқага бўлган талаби, умумий сув истеъмоли, мақбул суғориш тартиби, меъёри ва муддатларини аниқлашга қаратилган илмий-тадқиқотларни олиб боришга алоҳида эътибор қаратилди. Мазкур мақолада қишлоқ хўжалиги экинларини, хусусан, кузги буғдойни ресурс ва сув тежамкор технологиялар асосида етиштиришда илмий-техникавий ечимларга қаратилган назарий ва дала эксприментал тадқиқотлар натижалари келтирилган. Олиб борилган дала тадқиқотлари натижасида кузги буғдойни экиш технологияларини ҳисобга олиб (шудгор қилинган ҳамда ғўза қатор орасига ерга минимал ишлов бериб экилган) эгатлаб суғоришда мақбул суғориш техникаси элементлари такомиллаштирилган услуб ёрдамида ҳисоблаб топилган. Натижада ҳар хил технологияда экилган кузги буғдойни эгатлаб суғориш бўйича олиб борилган дала тадқиқот натижаларига асосланиб маълум объект учун ҳисобланган эгатлаб суғориш техникасининг мақбул элементлари келтирилган. Олиб борилган дала тадқиқотларида тупроқнинг сувни сингдириш тезлиги «Долгов ҳалқалари»дан фойдаланиб аниқланган бўлиб, олинган натижалар асосида шудгор қилинган ва минимал ишлов берилган далалар тупроғининг механик таркибига боғлиқ ҳолда сувни сингдириш қобилиятини ҳисобга олиб маълум бир дала шароити учун эгатларга бериладиган оптимал сув сарфлари аниқланган. Жиззах вилоятининг автоморф ва ярим гидроморф, механик таркиби енгил ва ўрта қумоқ тупроқлар шароитида даланинг нишаблиги i=0,002, ғўза қатор орасига тупроққа минимал ишлов бериб экилган майдонларда эгат кенглиги 0,9 метр, эгатлар узунлиги 100 метр ва шудгор қилинган майдонларда эса эгат кенглиги 0,6 метр, эгатлар узунлиги 100 метр, ғўза қатор орасига экилган майдонларда эгатларга бериладиган сув сарфи суғориш бошланганида 0,38 л/сек, шудгор қилиб экилган майдонларда эса 0,41 л/сек берилиши, сув эгат охирига етганидан кейин ғўза қатор орасига экилган майдонларда эгатга берилган сув сарфини 0,22 л/сек га, шудгор қилинган майдонларда эса 0,25 л/сек гача камайтириш натижасида эгатлаб суғоришда сувдан фойдаланиш самарадорлиги юқори бўлиши асосланган.