Мазкур мақолада XVI асрнинг иккинчи ярмига оид мис тангалардаги ѐзувлар таҳлил қилинган. Тангалар ЎзР ФА тарих музейи фондида сақланаѐтган хазина (Н 430) таркибида қайд этилган. Бухорода зарб этилган мис тангалардаги ѐзувлар янгича ўқилган ва таҳлил қилинган. Бу тангаларнинг орқа томонига – “янги танга, бир мисқол, пули олтмишга олтмиш”, яъни 120 пул тарзида ѐзув битилган. Мис тангаларда бундай ѐзув биринчи марта қайд этилмоқда ва бу аҳолини кумуш пулни майда мис тангага нисбатидан огоҳ этмоқда. Танганинг олд томонида динорнинг оғирлик стандарти қайд этилган. Бу ѐзувлар халқни танга зарб қилинган вақтдаги кумуш ва миснинг қонуний “курси”дан воқиф қилган. Шунингдек, мақолада Абдуллахон II томонидан Самарқандда, Тошкентда ва Сабронда зарб қилинган мис тангалар ѐзувлари ҳам ўрганилган. Бу тангалардаги ѐзувларнинг маъноси деярли бир хил бўлиб, мис-чақаларнинг орқа томонига “зулмкорларга тамға босилади” мазмунда ривоят битилган. Эҳтимол, тахтга ноқонуний равишда даъво қилувчи номзодлар учун бу битик огоҳлантирувчи, жазо олиши муқаррарлигини билдирувчи бир эслатма бўлгандир