Арпа уни билан ачитиш жараѐни мўйна териларига ишлов беришнинг анъанавий усулларидан ҳисобланиб, сифатли чарм тўқимасини таъминлаганлиги туфайли узоқ вақт давомида турли хилдаги мўйна хом ашѐларига ишлов беришда қўлланилиб келинган. Ҳозирги кунга қадар ишлаб чиқилаѐтган усулларнинг самарадорлигини баҳолашда айнан арпа уни билан ачитилиб ишлов берилган териларнинг юмшоқлиги ва чўзилувчанлиги яриммаҳсулотнинг юқори сифатли эталони сифатида қабул қилинади. Ачитиш жараѐни мураккаб биокимѐвий жараѐн бўлиб, унда арпа уни таркибидаги ўсимлик ферментлари комплексини ҳамда ачитиш натижасида ҳосил бўладиган органик кислоталар аралашмасини, бириктирувчи тўқималарнинг оқсил-углеводли комплексларига биргаликдаги таъсири кузатилади. Қоракул териларини арпа уни ѐрдамида ачитиш жараѐнида юкорида айтилган хоссаларга нисбатан кўпроқ эришилсада, бу услуб узоқ вақт ва озиқ-овкат маҳсулотларини ишлатишни талаб этиши, жараѐн боришини бошқариш ва жараѐн тугалланишини аниқлаш мураккаблиги сабабли, хозирги вактда қоракул териларига ишлов беришнинг янги услубларини ишлаб чиқиш, давр талаби бўлиб қолмокда. Қуйилган муаммо асосида бир қатор тадкикот ишлари олиб борилди. Қуруқ тузланган соф зотли қоракўл териларини ачитиш учун сут маҳсулотлари ишлаб чиқариш чиқиндиси-зардобни қўллаш амалий аҳамиятга эга бўлиши мумкин. Чунки зардоб таркибида ачитиш учун зарур бўлган сут кислотаси мавжуд. Соф зотли қоракўл териларини ачитиш жараѐнида арпа уни ўрнидан, сут маҳсулотлари чиқиндисидан олинган сут зардобини қўллаш бўйича бир қатор илмий-тадқиқот ишлари олиб борилди. Бунда 50%, 75% ва 100% концентрацияли сут зардобларидан фойдаланилди. Бир неча қоракўл тери намуналари ивитиш жараѐнлари ва мездралашдан сўнг юқорида келтирилган концентрацияли сут зардобларида ишлов берилди. Ўрганилаѐтган объектнинг кўрсатгичларини бир неча марта паралел ўлчашларнинг олиб борилиши олинган натижаларнинг тўғрилигини таъминлади. Сут зардобида ачитилган терилар билан қатор кимѐвий таҳлиллар ва механик синовлар ўтказилди.