Maqolada Noam Xomskiyning til — muloqotdan ko‘ra ko‘proq fikrlash vositasi ekanligi haqidagi qarashlari o‘rganildi va tadqiq etildi. Til galaktikasi odamlararo masofani to‘ldirib turadi deb ta’kidlangan, hamda uning asosiy xususiyati borliq cheksiz darajada o‘z aksini tilda topganligini belgilaydi. Til o‘ta abstrakt narsa, chunki u har qanday tushuncha yoki voqeaning mohiyatini ramziy aks ettirish imkoniyatiga ega. Inson faqat abstrakt fikrlay olishi bilangina hayvonot olamidan ajralib turdi. Inson nutqida abstraksiya bo‘lmagan birorta so‘z yo‘q. Masala shundan iboratki, insonning abstrakt fikrlash darajasi qancha yuqori bo‘lsa, u shuncha yaxshi fikrlaydi va voqealarning tub ma’nosiga yetib boradigan qobiliyatga ega bo‘ladi. Birgina so‘zning o‘zi mavjud bo‘lgan voqea yoki predmet ma’nosini to‘liq aks ettirolmaydi. Til yordamida uzatilgan har qanday belgilar bu obyektlarning o‘zi emas, balki shartli ko‘rinishidir. Mashhur tilshunosning pozitsiyasi til inson va uning fikrlash qobiliyatini rivojlanishi uchun global ahamiyatga ega bo‘lganligi nuqtayi nazaridan tadqiq etildi. Tahlil olimning R.Bervik bilan birgalikda yozilgan yangi “Gapirayotgan odam: til va tafakkur” kitobi asosida amalga oshirildi.