Мазкур мақолада реклама турлари ичида ХХI асрнинг янги имконияти саналган онлайн рекламанинг ўзига хослиги, унда маркетинг ва услуб хусусиятлари ўрганилган. Онлайн реклама тараққиёти бевосита интернет тараққиёти билан боғлиқлиги изоҳланган. Дунёнинг етакчи фирма, корхоналари ўз маҳсулотларини сотиш учун бу ҳақида кенг жамоатчиликни, керак бўлса бутун дунёни хабардор этишда ниҳоятда самарали тезкор ва арзон восита сифатида онлайн рекламани танламоқда. Ўзбек журналистикасида онлайн реклама деярли ўрганилмаган, шу сабабдан ҳам мақолада бу ҳақида тўхталиб ўтдик. Онлайн рекламани интернетда бир қанча номлар билан аташмоқда: Интернет реклама, веб реклама, онлайн маркетинг, дигитал реклама, онлайн АДС шулар жумласидандир. Биз мақолада онлайн рекламанинг қандай қилиб аудитория диққатини тортаётгани, фойдаланувчилар руҳиятига қандай таъсир кўрсатаётганини изоҳлаб ўтдик. Албатта бугунги кунда айнан бирор маҳсулот учун реклама тайёрловчи агентликлар талайгина бўлиб, улар ўртасида рақобат ҳам мавжуд. Тайёрланган реклама материали оммавий ахборот воситалари орқали эълон қилинади. Хусусан интернет орқали уларнинг катта қисми сайтларга жойланади. Модомики, интернет ОАВ сифатида эътироф этилар экан ундаги рекламаларни журналист нигоҳи билан ўрганиш долзарб бўлиб қолаверади.