Murakkab globallashuv sharoitida xalqaro munosabatlar va tashqi siyosat yondoshuvlarining o‘zgarishlar mahsuli sifatida paydo bo‘lgan progmatik tashqi siyosat, bugungi kunda siyosiy va harbiy nizolarning ortib borishi bilan yanada muhim ahamiyat kasb eta boshladi. Shu nuqtai nazardan rivojlangan mamlakatlar tashqi siyosatni amalga oshirishda turli zamonaviy yondoshuv va konsepsiyalardan foydalanishga e’tibor qaratmoqdalar. Maqolaning obyekti sifatida O‘zbekiston tashqi siyosati tanlab olingan bo‘lib, predmet sifatida tashqi siyosatida madaniy diplomatiyaning o‘rni belgilab olingan. Shuningdek, Yangi O‘zbekiston tashqi siyosatining Turk dunyosiga qaratilgan yo‘nalishi, asosan Markaziy Osiyo hududlaridagi joylashgan turkiyzabon davlatlarga nisbatan amalda qo‘llayotgan madaniy va xalq diplomatiyasi tadqiqotda ko‘rib chiqilgan. Tadqiqot davomida O‘zbekiston madaniy diplomatiyasi Turk dunyosi davlatlararo munosabatlarida alohida o‘rni borligi ochib berilgan. Bundan tashqari, maqolada tashqi siyosat va diplomatiyaning samarali ta’siri hamda tashqi siyosatni amalga oshirishdagi yumshoq kuch vositasining istiqbollari borasida nazariy fikrlar ilgari surilgan.