Maqolada portret va peyzajning turlari, rivojlanish jarayoni va vazifalari tahlil qilindi. Salomat Vafoning ikki hikoyasi “Elat” va “Arg‘imchoq” misolida obrazlarni yaratishda, ularga xos xususiyatlarni ochib berish peyzaj va portret tasviridan foydalanish mahorati o‘rganib chiqildi. Har ikki hikoyada ham yozuvchi portretning dinamik turidan foydalanganini, ya’ni personajning surati syujet voqeasidan alohida emas, boshqa qahramonlar tilidan, ruhiy kechinmalari haqida so‘zlash orqali kichik detallar bilan berilganini ko‘rishimiz mumkin. Shuningdek, yozuvchi ushbu hikoyalarida peyzajdan qahramonlarining ruhiy kechinmalarini ochib berishda asosan parallel, ayrim o‘rinlarda kontrast tarzda foydalangan. “Elat” hikoyasi bosh qahramon tilidan hikoya qilinib, uning ruhiy kechinmalari, xotiralari orqali har bir kitobxon ushbu qahramonning o‘ziga xos tasvirini xayolida chizib olishi mumkindir. “Arg‘imchoq” hikoyasida esa bosh qahramon portretini chizish vazifasini yozuvchi boshqa qahramonlarga topshirib qo‘ygan. Ularning o‘zaro suhbati, muhokamalari orqali tasavvurimizda bosh qahramon surati paydo bo‘ladi. Tadqiq jarayonida qiyosiy-tipologik, psixologik, sistem-struktur tahlil usullaridan foydalanilgan.