Аннотация. Мақолада Асака туманидаги “Турғунбой Шокиров” номли наслчилик фермер хўжалигида урчитилаётган соф швиц зотли сигирларни “VOSTOK” тизимидаги VOSTOK I.N.V. DE09 50550260 лақабли ва “XUVGER” тизимидаги XUVGER I.N.V. DE09 50738653 лақабли буқалар уруғидан фойдаланиб, сигирларни оталантириш ва улардан олинган учинчи лактациядаги қизларининг экстерьер хусусиятлари ҳақида маълумотлар берилган. ΙI гуруҳдаги сигирлар, яъни “XUVGER I.N.V. DE09 50738653” лақабли буқанинг қизлари ўз тенгқурларидан бўлган Ι гуруҳдаги “VOSTOK I.N.V. DE09 50550260” буқанинг қизларидан яғрин баландлигида 1,3 см ёки 0,9 %; кўкрак чуқурлигида 3,1 см ёки 4,4 %; кўкрак кенглиги бўйича 1,2 см ёки 2,8 %; орқа дунг суяк кенглигида 1,2 см ёки 2,3 %; тананинг қия узунлигида 1,2 см ёки 0,8 %; кўкрак айланасида 1,9 см ёки 1,3 % ва пойча айланасида 0,6 см ёки 2,9 % устунликни кўрсатган. Тана индекслари ўрганилганда, узуноёқлик индексида 1,8 %; чўзинчоқлик индексида 0,2 %; кўкракдорлик индексида 0,9 % устунлик биринчи гуруҳ сигирларида кузатилган бўлса, тос-кўкрак ва зичлик индексларида 0,4 %; суякдорлик индексида 0,3 % ва ўсувчанлик индексида 0,1 % иккинчи гуруҳдаги сигирлар фойдасига бўлган. Ҳар иккала гуруҳдаги сигирлар авлодлари экстерьер кўрсаткичлари бўйича сут типидаги сигирларга хос бўлган.