Ijodiy qobiliyat o‘z-o‘zidan paydo bo‘lib qolmaydi, u intellektual taraqqiyot uchun muayyan sharoitlarni hamda har qanday shaxsning o‘z ustida tinmay ishlashini va faollik namoyon etishini taqozo etadi. O‘quvchilar ijodkorlik faoliyatini tashkil qilishda ikki o‘zaro bog‘liq vazifani e’tiborga olish lozim. Ularning birinchisi – o‘quvchilarning ijodkorlik faoliyatida mustaqil fikrlash qobiliyatini rivojlantirish, bilim egallashdagi intiluvchanligini oshirish va ilmiy dunyoqarashni shakllantirishdan iborat. Ikkinchisi esa – o‘zlashtirilgan bilimlarni ta’limda va amaliy faoliyatda mustaqil qo‘llay olishga o‘rgatish bilan belgilanadi. Maqolada boshlang‘ich ta’lim o‘quvchilarining ijodiy qobiliyatlarini rivojlantirish uchun zarur bo‘lgan texnologiyalar, shart-sharoitlar va tamoyillar yoritib berilgan. Shu bilan birga, o‘quvchilarning ijodiy faoliyatiga yo‘naltirilgan innovatsion yondashuvlar ham tahlil qilingan. Bu jarayon ta’lim-tarbiyada zamonaviy metodlarni qo‘llashning ahamiyatini oshiradi.