Mazkur maqolada boshlang‘ich ta’lim tizimining xalqaro baholash dasturlari, xususan, PISA (Programme for International Student Assessment) va TIMSS (Trends in International Mathematics and Science Study) dasturlarining ta’lim tizimidagi o‘rni va ahamiyati tahlil qilingan. PISA va TIMSS dasturlari o‘quvchilarning akademik yutuqlarini, shu jumladan, mantiqiy fikrlash, muammolarni hal qilish va ilmiy kompetensiyalarini baholashga qaratilgan bo‘lib, bu dasturlar orqali ta’lim tizimlarining samaradorligi va o‘quvchilarning kompetensiyalari solishtiriladi. O‘zbekistonning boshlang‘ich ta’lim tizimida xalqaro baholash mezonlarini tatbiq etishdagi mavjud qiyinchiliklar va ularning pedagogik oqibatlari ko‘rib chiqilgan. Ushbu qiyinchiliklar asosan metodik tayyorgarlikning yetishmasligi, resurslarning kamligi va o‘qituvchilarning zarur malakalariga bog‘liq. Xalqaro baholash tizimlariga asoslangan ta’lim siyosati nafaqat ta’lim tizimining sifatini yaxshilash, balki mamlakatning iqtisodiy va ijtimoiy rivojlanishiga ham ijobiy ta’sir ko‘rsatishi mumkin. O‘zbekistonning boshlang‘ich ta’lim tizimida xalqaro baholash metodlarini tatbiq etish bo‘yicha olib borilgan tadqiqotlar tahlil qilinib, Finlandiya, Singapur va Yaponiya kabi ta’lim tizimlaridagi muvaffaqiyatli tajribalar o‘rganilgan. Ushbu mamlakatlarda o‘qituvchilarning yuqori malakalari, pedagogik metodikalari va ta’lim siyosatining samarasini oshirgan asosiy omillar sifatida e’tirof etilgan.