Лексиканинг зоонимик қатлами тадқиқотчилар учун доимий равишда эътибор марказида бўлган, чунки ҳайвонлар номлари билан боғлиқ бўлган мажозий маънога эга бўлган сонсаноқсиз иборалар ҳар бир тилнинг бойлиги ва такрорланмаслигидан даололат беради. Мазкур мақола рус ва ўзбек тиллари орнитологик («орнитология» юнончадан «ornis» – қуш, «logos» – таълимот) лексикасининг семантик таркибини ўрганишга бағишланган. Унда турлича тизимдаги тилларда хонаки қушлар номларининг коннотатив маънолари барқарор иборалар таркибида ёритилган, уларнинг бадиий адабиёт матнларида ифодаланиш мисоллари келтирилган, шунингдек мазкур иккала тилдаги орнитоним сўзлари билан боғлиқ бўлган муқобил иборалар, мақол ва маталлар аниқланган. Мазкур масаланинг ечимини топиш учун тадқиқот жараёнида компонентли ва статистик таҳлил методларидан фойдаланилди. Агарда компонентли таҳлил методи ҳар иккала тилда мавжуд бўлган барқарор иборалар таркибидаги орнитоним сўзларининг кўчма маъноларини ўрганиш имконини берган бўлса, статистик маълумотлар таҳлили методи турлича тизимдаги тилларда хонаки қушлар номлари билан боғлиқ бўлган барқарор иборалар сонини аниқлаш учун замин яратди. Мазкур мақола материалларининг амалий аҳамияти маданиятлараро мулоқот, шунингдек бир тилдан иккинчи тилга бадиий адабиёт матнларини таржима қилиши амалиётининг айрим масалаларини такомиллаштиришдан иборат.