Мақолада кинесик тизимларнинг тафовути туфайли турли маданият вакилларининг новербал хулқ-атвор хусусиятларини ўрганиш зарурлиги асослаб берилган. Инглиз, рус ва ўзбекларнинг нутқсиз хатти-ҳаракатлари таҳлил қилиниб, имо-ишораларни фарқи инглиз, рус ва ўзбек кинесик маданиятлари мисолида кўриб чиқилган. Ҳис-туйғулар нутқий актнинг ривожланиши, муваффақияти ёки муваффақиятсизлигига ва ҳар бир мулоқот иштирокчисининг эмоционал ҳолатини ифодалашга сезиларли таъсир кўрсатиши мумкин. Имо-ишоралар коммуникантнинг темпераментида, ҳиссий ҳолати ва суҳбатдошига муносабатида кузатиладиган миллий, ҳудудий ва ижтимоий хусусиятларни ифодалайди, шунинг учун муаллиф томонидан новербал матнни турли маданият вакиллари томонидан талқин қилиш билан чамбарчас боғлиқ бўлган маданиятлараро мувофиқлик муаммоси кўриб чиқилган. Новербал воситалар орқали узатиладиган хабар маъносини тўлиқ ва аниқ изоҳлаш учун новербал нутқни нотўғри, тўлиқсиз ва ортиқча талқин қилишдан сақланиш лозимлиги ҳолатлари далилланган. Новербал мулоқотнинг ўзига хос хусусияти универсал, тушунарли белгилар, шунингдек, фақат битта маданият доирасида ишлатиладиган махсус сигналларнинг мавжудлигини тушунтиради. Суҳбатдошнинг жисмоний ва психоэмоционал ҳолатини аниқлаш учун ишлатилиши мумкин бўлган оғзаки шаклда ифодалашни тўлдириш ва алмаштириш функцияларига эга бўлган оҳанг, тембр, овоз ритми ва кучи, артикуляциянинг фаоллиги каби нутқнинг фонацион ҳодисалари ҳам таҳлил қилинади.