Annotatsiya. Chorva hayvonlarining eksteryerini o‘rganish yordamida ularning zoti, zotdorligi, konstitutsiya tipi, konditsiyasi, yoshi, jinsi, mahsulot yo‘nalishi, mahsuldorlik darajasi, sog‘lomligi va harakatchanligini bilish mumkin. Ushbu maqolada, mintaqamizning janubiy hududi hisoblangan Qashqadaryo viloyati Mirishkor tumaniga xorijdan import yo‘li bilan olib kelingan sof zotli qizil eston va sof zotli golshtin sigirlarning birinchi tug‘um avlodlari hamda ulardan olingan qon ulushi turlicha bo‘lgan duragay avlodlarining eksteryer xususiyatlari to‘g‘risida ma’lumotlar keltirilgan. Eksteryer ko‘rsatkichlarini o‘rganishda 8 ta tana o‘lchamlari olingan. Ular: yag‘rin balandligi, ko‘krak kengligi, ko‘krak chuqurligi, ko‘krak aylanasi, dumg‘aza balandligi, gavda qiya uzunligi, yonbosh suyak cho‘qqilari kengligi va poycha aylanasi kabi o‘lchamlardir.