Maqolada O‘zbekiston (Gazeta.uz, Kun.uz, Podrobno.uz, UzNews) va Qozog‘iston (Kazinform, Nur.kz, Tengrinews, Zakon.kz) yetakchi internet OAV sarlavhalarining sintaktik xususiyatlari strukturasi qiyosiy tahlil asosida o‘rganildi. Zamonaviy OAVdagi sarlavhalarning sintaktik tuzilishi axborotni yetkazish strategiyalarining xilma-xilligini aks ettirishi sababli alohida tadqiqiy ahamiyatga ega. 480 ta sarlavha asosida “Siyosat”, “Sport” va “Madaniyat” kabi uchta mavzuiy ruknga ajratilgan holda gaplarning strukturaviy xususiyatlari chuqur tahlil qilindi. Ayniqsa, gap turlari (darak gap, so‘roq gap), ularning tuzilmasi (oddiy/ murakkab (ikki komponentli sarlavhalar alohida guruh sifatida ajratildi), bir tarkibli/ ikki tarkibli) hamda ajratilgan konstruksiyalarning qo‘llanishi alohida e’tiborga olingan. Tadqiqot natijalari har ikki mamlakatda quyidagi xulosalarni ko‘rsatdi: siyosiy diskursdagi sarlavhalar sintaksisi eng yuqori darajadagi variativlikka ega bo‘lib, unda murakkab gaplar va so‘roq konstruksiyalar keng qo‘llaniladi. “Madaniyat” rukni esa axborot yetkazuvchanligi va ifodaviylik o‘rtasidagi muvozanat bilan ajralib turadi, “Sport” yangiliklari esa sintaktik strukturalarning maksimal darajadagi standartlashuvi bilan tavsiflanadi. Bundan tashqari, Qozog‘iston OAV ikki komponentli konstruksiyalarga sezilarli moyillikni namoyon qilmoqda. O‘zbekiston nashrlari esa bunday konstruksiyalar mavjud bo‘lishiga qaramay, asosan ikki tarkibli standart gaplarga ustuvorlik beradi. Ushbu farqlar nafaqat ikki mamlakatdagi media amaliyotlarning xususiyatlarini, balki har bir mamlakatda maqsadli auditoriyaning axborotni qabul qilishiga oid o‘ziga xosliklarni ham aks ettiradi.