Har yili 14-oktyabr sanasi dunyo miqyosida Xalqaro Standartlar Kuni sifatida nishonlanadi. Ushbu sana xalqaro standartlashtirish tashkilotlari – ISO, IEC va ITU tomonidan joriy qilingan bo‘lib, uning asosiy maqsadi ishlab chiqarish, xizmat ko‘rsatish va savdo sohalarida xalqaro standartlarning ahamiyatini keng jamoatchilikka yetkazishdan iboratdir. O‘zbekiston Respublikasi jadal sur'atlar bilan iqtisodiy islohotlarni amalga oshirayotgan hozirgi davrda, xalqaro standartlar mamlakatning tashqi savdo aloqalarini kengaytirish, mahsulotlar va xizmatlar raqobatbardoshligini oshirish hamda BSTga (Butunjahon savdo tashkiloti) a'zo bo‘lish jarayonida muhim vosita bo‘lib xizmat qilmoqda.