Maqolada nasos stansiyalarining energiya samaradorligini oshirish usullari koʻrib chiqilgan, bu esa ekspluatatsiya xarajatlarini kamaytirish va energiya isteʼmolini qisqartirish maqsadida amalga oshiriladi. Uskunalarni modernizatsiya qilishga, avtomatlashtirilgan boshqaruv tizimlarini joriy etishga va nasoslarning ishlashini turli konstruktiv, texnologik va elektr parametrlariga qarab tartibga solishga alohida eʼtibor qaratilgan. Energiyani yoʻqotishlarni minimallashtirishga yordam beradigan va nasos tizimlarining barqarorligi hamda ishonchliligini taʼminlaydigan ilgʻor texnologiyalar misollari keltirilgan. Nasos stansiyalarning energiya isteʼmoli holati tahlil qilingan, ularining konstruktiv xususiyatlariga va ishlashiga qarab energiya tejashning sezilarli zaxiralari borligi koʻrsatib oʻtilgan. Bundan tashqari nasos stansiyasining ish rejimlari, suvni isteʼmol qilish jadvali va nasos stansiyasining agregatlari tomonidan koʻtarib beriladigan suvning haqiqiy hajmi oʻrtasidagi tafovut borligi koʻrsatilgan. Nasos stansiyalarining ish rejimlari tahlil qilingan va nasos stansiyasi isteʼmoli va unumdorligini suv taʼminoti hajmlari bilan moslashtirish masalasini hal qilish uchun istiqbolli usullar taklif etilgan, shuningdek, “dvigatel-nasos” tizimi ish rejimlarini takomillashtirish imkoniyatlari koʻrib chiqilgan. Nasos stansiyasi ish rejimlarini tahlil qilishda konstruktiv, texnologik va energetik parametrlar hisobga olindi. Nasos tizimlarini samarali boshqarish uchun texnologik va elektr parametrlarini oʻzgartirish talab etiladi. Nasos tizimlari elektr yuritmalarini chastotali boshqarish algoritmlari energiya isteʼmolini 10-17% ga kamaytirib, suv taqsimotining aniqligini 15% ga oshirishi mumkin. Ushbu yondashuv energetik va suv resurslaridan barqaror va samarali foydalanishga yordam beradi.