Mazkur maqolada O‘zbekistonga to‘g‘ridan-to‘g‘ri xorijiy investitsiyalarni jalb qilish imkoniyatlari SWOT tahlil asosida chuqur tahlil qilinadi. Mavzuning dolzarbligi, mamlakat iqtisodiyotining barqaror o‘sishini ta’minlash, raqobatbardosh tarmoqlarni rivojlantirish va zamonaviy texnologiyalarni joriy etishda xorijiy investitsiyalar muhim omil ekanligi bilan belgilanadi. SWOT tahlil orqali O‘zbekistonning kuchli va zaif tomonlari, mavjud imkoniyatlari hamda ehtimoliy tahdidlari aniqlanib, ularga asoslangan holda aniq xulosalar va takliflar ishlab chiqilgan. Tadqiqot davomida mavjud ilmiy adabiyotlar tahlili, statistik ma’lumotlar va huquqiy-me’yoriy bazalar o‘rganildi. Maqolada ilgari surilgan tavsiyalar xorijiy investorlar uchun qulay muhit yaratish, investitsiyaviy xavfsizlikni ta’minlash va investitsiya siyosatini yanada takomillashtirishga xizmat qiladi.