Maqolada O‘zbekistonda global energetika tizimidagi islohotlar va ekologik barqarorlikni ta’minlash maqsadida qayta tiklanuvchi energiya manbalarini rivojlantirish bo‘yicha davlat siyosati tahlil qilindi. Tadqiqotda 2021–2025-yillarda amalga oshirilayotgan quyosh, shamol va issiqlik elektr stansiyalari hamda elektr ta’minoti tizimini raqamlashtirish va avtomatlashtirishga qaratilgan loyihalar o‘rganildi. Xususan, Jahon banki tomonidan ajratilgan 100 million dollar imtiyozli kredit va “Hududiy elektr tarmoqlari” AJning 50 million dollarlik investitsiyalari asosida 6000 km uzunlikdagi elektr uzatish tarmoqlari qurilishi, 1200 ta transformator o‘rnatilishi va 150 ming “aqlli” hisoblagich joriy etilishi rejalashtirilgan. Ijtimoiy so‘rovlar natijalari aholining energiya ta’minoti sifati va tarif siyosatiga munosabati haqida ma’lumot berdi. Tadqiqot natijalari yuqoridagi chora-tadbirlar elektr ta’minotining ishonchliligini oshirish va iqtisodiy tengsizlikni kamaytirishga xizmat qilishini ko‘rsatdi. Shuningdek, energiya tejamkor texnologiyalarni joriy etish va xususiy investitsiyalarni jalb qilish orqali barqaror energetika tizimini shakllantirishga erishiladi.