Ushbu tadqiqotda 2010–2024 yillar davomida Farg‘ona vodiysidagi Farg‘ona, Andijon va Namangan viloyatlarida kichik biznesning rivojlanish dinamikasi o‘rganildi. Tahlil uchun faoliyat yuritayotgan kichik biznes subyektlari soni, kichik bizneslarning bandlikdagi ulushi, Yalpi hududiy mahsulotdagi (YHM) ulushi hamda asosiy kapitalga kiritilgan investitsiyalar hajmi asosiy ko‘rsatkichlar sifatida tanlab olindi. Ma’lumotlar O‘zbekiston Respublikasi Davlat statistika qo‘mitasi, viloyat statistika boshqarmalari rasmiy saytlari kabi ishonchli manbalar asosida yig‘ildi. Tadqiqotda taqqoslama-statistik yondashuv qo‘llanilib, kichik biznes ko‘rsatkichlarining hududlar kesimidagi o‘zgarishlari va tendensiyalari tahlil qilindi. Tasviriy statistika usullari yordamida o‘rtacha qiymat, standart og‘ish, minimal va maksimal qiymatlar hisoblandi. Shuningdek, tanlangan indikatorlarning yillik o‘sish sur’ati CAGR (Compound Annual Growth Rate) formulasi asosida aniqlandi. Tahlil natijalari grafik va diagrammalar ko‘rinishida vizual tarzda taqdim etildi, bu esa yillik o‘zgarishlar va viloyatlararo tafovutlarni aniqroq namoyon etishga xizmat qiladi. Vizualizatsiya orqali hududlar kesimidagi rivojlanishning uzoq muddatli tendensiyalari va omillar o‘rtasidagi bog‘liqliklar yoritib berildi.