Ushbu ilmiy maqolada O‘zbekiston Respublikasi bojxona tizimi orqali tadbirkorlik subyektlarini qo‘llab-quvvatlashning institutsional va huquqiy asoslari chuqur tahlil qilingan. Mamlakatda tadbirkorlikni rivojlantirish davlat siyosatining ustuvor yo‘nalishlaridan biri sifatida belgilangan bo‘lib, bu borada bojxona xizmatlari muhim vositalardan biri hisoblanadi. Maqolada “Yangi O‘zbekiston” taraqqiyot strategiyasi, Prezident farmonlari, Hukumat qarorlari va Davlat bojxona qo‘mitasi me’yoriy hujjatlari asosida tadbirkorlar uchun yaratilayotgan qulayliklar va imtiyozlar yoritilgan. Shuningdek, elektron bojxona tizimlarining joriy etilishi, “yagona darcha” mexanizmi, bojxona rasmiylashtiruvi muddatlarini qisqartirish, tashqi iqtisodiy faoliyatni soddalashtirish kabi islohotlar ko‘rib chiqilgan. Maqolada respublikadagi amaldagi qonunchilik asoslari, ularning tadbirkorlik subyektlariga yuklaydigan huquq va majburiyatlari, mavjud institutsional tuzilmalar hamda ularning o‘zaro aloqalari xolisona tahlil qilingan. Tahlillar asosida tizimdagi mavjud muammolar (byurokratik to‘siqlar, texnik infratuzilmaning yetishmasligi, kadrlar salohiyatining pastligi va boshqalar) aniqlanib, ularni bartaraf etishga doir amaliy tavsiyalar ham taklif qilingan.