Maktabda tabiatshunoslik fanlarini o‘rganar ekanmiz, bu fanlar asosida yotgan qonuniyatlar va hodisalar nafaqat ilmiy mazmunga, balki o‘ziga xos tarixiy jarayonlarga ham ega ekani ayon bo‘ladi. Bu qonuniyatlar uzoq yillik ilmiy izlanishlar, tajriba va kuzatuvlar, ayrim hollarda esa ziddiyatli siyosiy-ijtimoiy sharoitlarda olib borilgan sa’y-harakatlar evaziga shakllangan. Ilmiy faoliyat taqiqlangan davrlarda ham, izchil va fidokorona mehnat tufayli hozirgi kunda foydalanilayotgan laboratoriya uskunalari, o‘quv darsliklarida uchraydigan ilmiy printsiplar yaratilib, takomillashtirib borilgan. Ushbu maqolada o‘z davrining murakkab siyosiy va ijtimoiy sharoitlarida ham ilm yo‘lidan qaytmagan, dunyo ilm-fani rivojiga ulkan hissa qo‘shgan mashhur olim Jozef Lui Gey-Lyussakning hayoti, ilmiy merosi va maktabi haqida so‘z yuritiladi. Maqola, ayniqsa, tabiatshunoslik fanlariga endigina qadam qo‘ygan o‘quvchilar hamda oliy ta’lim muassasalarining boshlang‘ich bosqichida tahsil olayotgan talabalar uchun ilm-fanga bo‘lgan qiziqishni oshirish va mashaqqatlarni yengib o‘tishda ilhom manbai bo‘la oladi.