Ushbu ilmiy ishda talabalarni ma’naviy nafosatli shaxs qilib tarbiyalash jarayonining psixologik va pedagogik xususiyatlari har tomonlama tahlil etilgan. Ma’naviy nafosat - bu shaxsning axloqiy poklik, estetik did, ichki intizom, ijtimoiy mas’uliyat kabi fazilatlarni o‘zida mujassamlashtirgan yuksak insoniy sifatlarini anglatadi. Tadqiqotda aynan shu fazilatlarni shakllantirishda oliy ta’lim muassasalarining o‘rni, pedagogik metodlar, shaxsga yo‘naltirilgan yondashuv, milliy va umuminsoniy qadriyatlar uyg‘unligi asosida tarbiya berishning dolzarb masalalari yoritilgan. Psixologik nuqtai nazardan, yoshlar ongida ijobiy e’tiqod va hayotiy pozitsiyani shakllantirish, emotsional barqarorlikni mustahkamlash, o‘z-o‘zini anglash va nazorat qilish ko‘nikmalarini rivojlantirish kabi jihatlar chuqur tahlil qilingan. Pedagogik jihatdan esa, interfaol ta’lim texnologiyalaridan foydalanish, ijtimoiy faoliyatga jalb etish, madaniy-ma’naviy muhit yaratish orqali talabalar shaxsini har tomonlama kamol toptirish strategiyalari ishlab chiqilgan. Tadqiqot natijalari pedagog-kadrlar, oliy o‘quv yurtlari o‘qituvchilari va psixologlari uchun amaliy qo‘llanma bo‘lib xizmat qiladi.