Ushbu maqolada rus va o‘zbek tillarida so‘nggi yillarda shakllanayotgan neologizmlar qiyosiy-lingvistik jihatdan tahlil qilinadi. Tadqiqot raqamli kommunikatsiya muhitida yuzaga kelayotgan yangi leksik birliklarning kelib chiqish manbalari, tematik tasnifi, strukturaviy modellari hamda nutqiy-funksional xususiyatlarini aniqlashga qaratilgan. Tadqiqot materiali sifatida onlayn ommaviy axborot vositalari, ijtimoiy tarmoqlar, bloglar va neologik birliklarga oid ilmiy-ommabop matnlardan iborat korpus tanlab olindi. Tahlil natijalari rus tilida yangi leksikaning shakllanishida to‘g‘ridan-to‘g‘ri qarz olish hamda affiksal so‘z yasalishi yetakchi o‘rinni egallashini ko‘rsatdi. O‘zbek tilida esa gibrid fe’l birikmalari va milliy affikslar asosida so‘z yasash jarayoni faol kechayotgani aniqlandi. Yangi leksik birliklar til tizimining uzluksiz rivojlanishini, raqamli avlodning lingvistik o‘ziga xosligini hamda ikki tillilik jarayonlarining ta’sirini aks ettiruvchi muhim lingvistik hodisa sifatida baholanadi.