Ko‘priklarning seysmohimoyalash tizimlari va usullari

Mazkur maqola ko‘priklarni maxsus seysmohimoyalash tizimlarini loyihalash va hisoblash usullarini tahlil qilishga bag‘ishlangan. Hozirgi kunda seysmik faol hududlarda transport inshootlarining ishonchliligini ta’minlashda seysmoizolyasiya tizimlari yetakchi muhandislik yechimi sifatida qaralmoqda. AQSh, Yaponiya, Italiya, Yangi Zelandiya, Germaniya va Fransiya kabi rivojlangan davlatlarda ko‘priklarning zilzilabardoshligini oshirishda elastomerli, sirpanuvchi, qo‘rg‘oshinli hamda sharsimon tayanch qismlar keng qo‘llanilmoqda. Maqolada xorijiy tajribalar, jumladan, MAURER SOHNE va FIP Industriale firmalari tomonidan ishlab chiqilgan seysmoizolyasiyalovchi qurilmalar, shuningdek San-Fransisko va Millau viaduklarida joriy etilgan sharli tayanch qismlar samaradorligi ko‘rib chiqilgan. Bundan tashqari, sobiq Ittifoq hududida, xususan Toshkent shahrida barpo etilgan metropoliten ko‘priklarida seysmoizolyasiya qo‘llanilishining ilk tajribalari yoritilgan. Maqolada ko‘priklar uchun seysmoizolyasiya tizimlarini tanlash va ularning parametrlarini hisoblashda hisobiy dinamik sxema, yuklanishlarni qayta taqsimlash, tayanchlararo siljishlarni cheklash hamda dempfirlash darajasini optimallashtirish kabi muhim omillar asoslab berilgan, va bular ustida ilmiy izlanishlar olib borilgan. Tadqiqot natijalari ko‘priklarni seysmohimoyalash tizimlarini loyihalashda ilmiy asoslangan yondashuv zarurligini ko‘rsatadi.