Долзарблиги. Адабиётларда келтирилган маълумотларга кўра подагра касаллиги билан оғриган беморларда буйракларнинг зарарланиши катта кўрсаткичларда, яъни 30% дан 70% гача учрайди. Замонавий адабиётларда “подагрик нефропатия” деган тушунча ажратилган, бу эса подагра касаллигида учрайдиган барча буйрак патологиялари билан характерланади. Сийдик билан микропротеинларнинг ажралиши буйраклар зарарланишидан дарак беради. Материаллар ва усуллар. Сурункали подагрик артрити бўлган 103 нафар бемор текширилди. Иммунофермент усули ёрдамида сийдикда микропротеинлар топилиши натижасида подагрик нефропатия субклиник кечаётганлиги аниқланди. Шунга кўра беморлар 2 гуруҳга ажратилди: I (n = 58) - субклиник подагрик нефропатия билан бўлган беморлар (56,3%), II (n = 45) – назорат гуруҳи, буйраклари зарарланмаган беморлар (43,7%). Тадқиқот натижалари ва муҳокама. Маълум бўлишича, семизлик, артериал гипертензия, қандли диабети бўлган подагра билан оғриган беморларда микроальбуминурия ва микроглобулинурия миқдорининг юқори даражада ошиши кузатилади. Шунингдек, сийдикдаги микроальбуминлар, микроглобулинлар қондаги сийдик кислота, триглицеридлар миқдори билан бевосита боғлиқ. Хулоса. Шундай қилиб, тадқиқот ўтказиш давомида, подагрик нефропатияни чақириши мумкин бўлган омиллар қўйидагилар эканлиги аниқланди: семизлик, артериал гипертензия, қандли диабет, гиперурикемия, гипертриглицеридемиялар. Шуни таъкидлаш керакки, подагрик нефропатияга олиб келувчи омилларни бартараф қилиш ва уларни назорат қилиш натижасида касаллик олди олиниши мумкин.