2021 йилда Абу Али ибн Сино номидаги Бухоро вилояти ахборот-кутубхонаси эшиги очилганига ҳам қарийб 100 йил тўлади. Кутубхона тарихи бевосита ушбу соҳа фидойилари номи билан чамбарчас боғлиқ. Мақолада Бухоро вилоят ахборот-кутубхонасининг илк фидойи раҳбарлари ҳақида сўз боради. Улар: таниқли шарқшунос олим қори Ибодулло Одилов, Бухоронинг биринчи таржимонларидан Олимшо Ҳамрошоевлар. Улар кутубхона фондини шакллантириш ва каталоглаштиришда катта ҳисса қўшади. Ўттиз йилдан ортиқ ҳаётини кутубхона ишига бағишлаган раҳбарлардан бири Раҳманова Муборак Муҳаммедовнадир (1961–1986 йй.). Унинг раҳбарлик йилларида кутубхона вилоятдаги барча кутубхоналар учун методик марказ бўлиб шакллантирилади. М. Раҳмонованинг ташаббускорлиги ва шижоати билан 1971 йил Бухоро шаҳрида 500 минг китоб фондига мўлжалланган вилоят кутубхонасининг янги биноси қурилди.