Ушбу мақолада ўзбек тилида синонимлар корпусини тузиш тамойиллари, меъёрлари ва босқичлари ҳақида сўз юритилади. Корпус тилшунослигининг Ўзбекистонда ўрганилиш тарихи, миллий корпус яратишга оид тадқиқотлар тўғрисидаги маълумотлар келтирилган. Шунингдек, глобаллашув шароитида ўзбек тилининг синонимлар корпусини яратиш масаласи тилимизнинг равнақи учун нечоғлик муҳим экандиги, тилшуносликда электрон дастурлар ёрдамида она тилини ўрганишнинг аҳамияти алоҳида қайд этилган. Шундан келиб чиққан ҳолда замонавий ўзбек тилининг синонимлар корпусини яратиш бўйича дастлабки ҳаракатлардан бири сифатида ишнинг тадқиқот талаблиги асосланган. Мақолада лексик бирликлар синонимларининг корпусларда берилиши "юз" сўзи мисолида таҳлил қилинган ва унинг интерфейси намуна сифатида келтирилган. Унда "юз" сўзининг қайси сўз туркумига мансублиги, омоними, антоними, таркиби, ясалиши, услуби, тузилилиши, даражаланиш қатори, маъноси, этимологияси, ишлатилиши, рус ва инглиз тилларидаги муқобиллари келтирилган. Бу ўз навбатида ўзбек тилини чет тили сифатида ўрганувчилар ва тилни масофадан ўргатиш учун электрон дарсликлар, узбек тилининг электрон лугтларини яратиш, машина ва автоматик таржима масалалрини янада ривожлантиришга ёрдам беради. Ушбу тадқиқот ишида синонимлар корпусини яратиш мақсадида ўзбек тилида мавжуд саккизта лингвистик луғатлардан иборат лексикографик манбаяардан фойдаланилди. Синонимлар базасини яратиш борасидаги мазкур иш ўзбек тилининг миллий корпусини яратиш тўғрисида тадқиқотларнинг бошланишидир. Бошқа тил ҳодисалари ва бирликларининг базасини яратиш ўзбек тилининг корпусини яратиш борасидаги тадқиқотларнинг давомидир.