Ушбу мақолада буюк шоир Алишер Навоий “Хамса”си таркибидаги “Фарҳод ва Ширин” достонининг насрий баёнлари ва талқинлари хусусида фикр юритилган. “Хамса” достонларини насрийлаштириш анъанаси навоийшуносликнинг катта ютуқларидан биридир. Бу насрий баёнларда ўтмишда шеърий асарларни наср йўли билан шарҳлаш, достонларни насрийлаштириш, улар асосида насрий қиссалар яратиш каби амалларнинг энг юксак фазилатлари мужассам бўлган. Улар ана шу тажрибалар, анъаналар асосида бунёд этилган. Аслият моҳиятига олиб борадиган ягона йўл ҳам уни наср билан тушунтириб беришдир . “Хамса” достонларини бугунги кун ўқувчиси эҳтиёжларига мувофиқ талқин этиш, уни янада мукаммаллаштириш учун мавжуд насрий баёнлар юзасидан бир талай ишларни амалга ошириш зарур. Мазкур мақолада Алишер Навоийнинг “Фарҳод ва Ширин” достонининг шу кунгача нашр қилинган насрий баёнлари қиёсий ўрганилиб, насрий талқинларнинг ўзаро уйғун ва фарқли жиҳатлари хусусида фикр юритилган.