Mazkur maqolada ekish oldidan yerga ishlov berishda qo‘llaniladigan chizel-kultivatorlarning konstruktiv tuzilishi va texnologik imkoniyatlari tahlil etilgan. Respublikamizda ishlab chiqarilayotgan CHK-4-6, CHKU-4A va CHK-4M rusumli agregatlarning texnik ko‘rsatkichlari hamda ish jarayoni ko‘rib chiqilgan. Ish organlarining joylashish sxemasi va agregatlanish sharoitlari samaradorlik nuqtai nazaridan baholangan. Xorijiy ishlab chiqaruvchilarning keng qamrovli kultivatorlari bilan solishtirma tahlil amalga oshirilgan. Ularning konstruktiv xususiyatlari, afzallik va kamchiliklari yoritilgan. Chizel-kultivatorlarning tuproqni sifatli yumshatish va begona o‘tlarni yo‘qotishdagi roli asoslab berilgan. Shuningdek, qamrov kengligi, ishlov berish chuqurligi va traktor tortish klassining ta’siri aniqlangan. Tadqiqot natijalari energiya-tejamkor va yuqori unumdor texnikalarni tanlashda muhim ahamiyat kasb etadi.