Olimlar tomonidan dunyoning turli mamlakatlarida sho‘rlangan cho‘l yaylovlarining mahsuldorligini oshirish muammolarini hal etishga qaratilgan ko‘plab tadqiqotlar olib borilgan. Jumladan, Arizona Universiteti (AQSh) olimlarining ilmiy izlanishlarini alohida ta’kidlash lozim. Ular galofit o‘simliklarning boy kolleksiyasini yaratib, minerallashgan dengiz suvi bilan sug‘orishga chidamli turlarni tanlab oldilar hamda yuqori sifatli moyli sho‘ra navini yaratdilar. Sho‘ra yuqori hosildor ekin bo‘lib, gektaridan 200 sentner pichan va 20 sentner urug‘ olish mumkin. Har bir gektardan yig‘ib olingan urug‘dan 600 kg gacha moy ishlab chiqariladi. Respublikamizda ham sho‘rlangan yaylovlar mahsuldorligini galofitlardan foydalanish orqali oshirish bo‘yicha tadqiqotlar olib borilgan. Ushbu tadqiqotlarda 35 tur va 550 dan ortiq galofit namunalari o‘rganildi. Ular orasidan tojixo‘roz (Kochia scoparia), oq sho‘ra (Chenopodium album), Atriplex nummularia (Atriplex nitens), sho‘rsevar shuvoq, kamforosma va chogon kabi istiqbolli turlar aniqlandi. 2017-yilda tojixo‘rozning gektaridan 150–160 sentner fitomassa beradigan “Malika” navi yaratildi. 2021-yilda esa atripleksning gektaridan 75–80 sentner pichan beradigan “Odil” navi yaratilib, ularni yetishtirishning agrotexnik usullari ishlab chiqilgani haqida ma’lumotlar e’lon qilindi.