Maqolada Samarqand va Qashqadaryo viloyatlari qorakoʻlchilik xoʻjaliklari yaylovlarida chorva mollari uchun foydalanilayotgan artezan va shaxta quduqlaridan olingan suv namunalarini dastlabki dala sinovlaridan o‘tkazish natijalari keltirilgan. Bunda suv namunalarining fizik-kimyoviy koʻrsatkichlari “7 in 1” tipidagi, C-600 rusumili portativ multiparametrli analizator yordamida aniqlangan. Dastlabki dala sinovlarida suvning kislotaligi (Ph), umumiy erigan moddalar miqdori (TDS), oksidlanish-tiklanish potensiali (ORP), elektr oʻtkazuvchanligi (EC), shoʻrlanish darajasi (SALT), nisbiy zichligi (SG) va harorati (TEMP) aniqlangan. Tadqiqot natijalariga asosan, shaxta quduqlaridan olingan suv namunalarining umumiy erigan moddalar miqdori yuqori boʻlib, bu koʻrsatkich suvning elektr oʻtkazuvchanligi, shoʻrlanish darajasi va zichligi bilan bogʻliqligi aniqlandi.