Мазкур мақолада XIII–XIV асрларга оид Хоразм ҳудудида Носируддин Рабғузий томонидан исломий манбалар асосида илк бор туркий тилда яратилган “Қисаси Рабғузий” асари луғати таркибида аниқланган арабий ўзлашмалар мавзуий гуруҳларга ажратилган ҳолда таҳлил қилинган. Асар тилидаги арабий ўзлашмаларни диахрон аспектда ўрганиш тил фактларининг тараққий этиш усулларини аниқлаш учунгина эмас, балки уни яратган халқ тарихини тадқиқ қилиш учун ҳам алоҳида аҳамиятга эга. Тилнинг тарихий ривожланиш жараёни ва луғат бойлигини ўрганишнинг кенг тарқалган усулларидан бири тилдаги сўзларни мавзуий гуруҳларга ажратиб таҳлил қилишдир. Асарда келтирилган арабий сўзларнинг қайси соҳа тармоқларига оидлигини аниқлаш, мавзуий жиҳатдан гуруҳлаштириш асар яратилган давр халқларининг маънавияти, ҳуқуқий савияси, қўшни ва қардош халқлар билан олиб борган ҳамкорлик муносабатлари ҳақида тўлиқ тасаввурга эга бўлиш имкониятини ҳам беради. Тадқиқот натижасида асарда келтирилган арабий ўзлашмаларнинг 24 та мавзуий гуруҳи аниқланиб, илмий асосда таҳлил қилинди.Тилнинг луғат бойлигини мавзуий гуруҳларга ажратиб таҳлил қилиш бўйича амалга оширилган тадқиқотлар юзасидан тўхталиб ўтилди. Асар тилида фаол тарзда қўлланилган атоқли отларнинг бир неча турлари аниқланди. Жумладан, ўзлашма ва экзотик антропонимлар, этноним, теоним ва топонимлар ҳамда диний лексика асар тилида энг кўп қўлланилган гуруҳлар сифатида хулоса қилинди. Мазкур тадқиқот XIII–XIV асрлар туркий халқлар тилида арабча сўзларнинг ўзлашиш жараёни ва луғат бойлигини ўрганишда муҳим аҳамият касб этади.