Мақолада Марказий Осиёдаги Ануштегиний-Хоразмшоҳлар даврида етишиб чиққан алломаларнинг бой илмий мероси Маҳмуд ал-Чағминий мисолида ўрганилди. Тарихдан маълумки, Алоуддин Отсиз ҳукмронлиги даври Хоразмшоҳлар салтанатининг энг ёрқин саҳифаларидан ҳисобланади. Гурганч ва Марв мадрасаларида истеъдодли мударрислар қўлида таълим олган Отсиз жуда билимдон ва фаҳм-фаросатли киши бўлган. Гурганчда Хоразмшоҳ Отсиз ташаббуси билан қайта тикланган Академияга асосан филология (илми адаб, илми нахв), фалсафа, илоҳиёт, фиқҳ, табиий фанлар, илми зироат, тиббиёт, меъморчилик, сув иншоотлари (тўғонлар, чигирлар, корез-қанотлар), кемасозлик, темирчилик ва бошқа ҳунармандчилик турлари (дурадгорлик, мисгарлик, кулолчилик, ва ҳ.к.) назарий асослари ва амалиёти ҳақида илмий тадқиқот ишлари олиб борилди. Мақолада Маҳмуд ал-Чағминийнинг илмий мероси ва унинг Шарқ ва Ғарб мамлакатлари олимлари томонидан ўрганилиши илмий жиҳатдан таҳлил қилинди.