АЦЕТАЛЬДЕГИД СИНТЕЗИ КАДМИЙ-КАЛЬЦИЙ-ФОСФАТ КАТАЛИЗАТОРИНИ ОЛИШ

Муаммонинг келиб чиқиши. АИЧИИ (РФ) да ТУ 113-03-00209510-108-2006 асосида ишлаб чиқарилган ККФ-Н катализатори «NAVOIYAZOT» АЖ да 340-350°С ҳароратда ва 0.2-5-0.7 атм. босим остида ацетальдегид ишлаб чиқаришда фойдаланилади. ККФ нинг фойдаланиш муддати кўп эмас: хар 3-6 ойда уни қайта алмаштириш, бунинг учун янги ККФ сотиб олиш талаб қилинади. Бироқ уни маҳаллий хом-ашё ёки ишлатилган ККФ катализаторидан ишлаб чиқаришни йўлга қўйиш мумкин, бунинг учун мос технологияни яратиш талаб қилинади. Ишнинг мақсади. ККФ катализаторини мақбул синтез қилиш йўлини асосли танлаш, «Навоиазот» АЖ да лаборатория саноат-синови учун намуналарни тайёрлаш, жараённинг технологик картасини яратиш. Методология. Кадмий оксидининг масса миқдори ТУ 113-03-00209510-108-2006 бўйича аниқланади. ККФ синтези учун катализатор массасини муҳит pH (6.8-7.1) бўлганда кадмий кальций тузларини фосфат ионлари иштирокида чўктириш усулидан фойдаланилди. Лаборатория термостати, рН-метр ЭВ-74 дан фойдаланилди. Илмий янгилиги. ККФ синтези жараёнининг технологик параметрлари ишлаб чиқилди, эритмалар концентрацияси, г/дм3: Cd(NО3)2, CdO га ҳисоблаганда 22.8; Ca(NО3)2, CaO га ҳисоблаганда 103.6; ортофосфат кислотаси - 25%; аммиак суви - 10%. ККФ ни чўктиришни муҳит рН 6.8-7.1 бўлганда; 90 дақиқа давомида олиб борилади; чўкмани ювиш - NO3- ионлари йўқолгунча, қуритиш - 100-110°С ҳароратда; майдалаш, графит билан аралаштириш (2%) ва таблетка ҳолига келтириш. Олинган натижалар. Лаборатория шароитида ацителен-буғ аралашмасидан ацетальдегидни синтез қилиш учун ишлаб чиқилган технологик схема бўйича ККФ катализатори намуналари олинди, уларнинг каталитик фаоллигини аниқлаш учун «Навоиазот» АЖ га юборилди. Жараённинг технологик картаси яратилди, ишлаш тартиби – даврий. Ишлаб чиқарилган маҳсулотнинг тавсифлари берилди. Хусусиятлари: - ККФ-Н синтез жараёнининг технологик картаси ишлаб чиқилди; - технологик карта бўйича ККФ катализатори намуналари олинди; - синтез қилинган ККФ катализатори намуналари текшириш учун юборилди.