Инсоният ХХI асрда юксак тараққий этаётган информацион технологиялар асрига қадам қўйди. Эндиликда дунёнинг исталган нуқтасида содир бўлаётган ҳар қандай янгилик яшин тезлигида бутун дунёга тарқалади. Инсониятнинг энг қадимий тафаккур шаклларидан бири бўлган бадиий ижод ҳам бу юксак технологиялар асрида жуда жиддий синовларни бошидан ўтказмоқда. Турли халқлар ўртасидаги адабий алоқалар, адабий таъсир ҳам ўзига хос кўриниш олди. Жаҳон адабиётининг энг сара намуналари нашр қилиниши билан жуда тезликда шарқ тилларига таржима қилинмоқда. Бунинг натижасида ғарб ёзувчиларининг ёзиш услуби, уларга хос тафаккур тарзи ҳам секин-аста миллий адабиётларга ҳам ўз таъсирини кўрсатмоқда. Шундай жараёнлардан бири бу шарқ халқлари адабиётига ғарбда кенг тарқалган модернизм, постмодернизм, сюрреализм сингари адабий оқимларнинг кириб кела бошлаганлигидир. Бу оқимларнинг таъсири турли оқибатларга олиб келади. Улар маълум бир халқ адабиётидаги миллийлик хусусиятларига путур етказиши ҳам мумкин. Агар ижодкорлар бу оқимларни кўр кўрона ўзлаштирсалар, унда тақлидчилик руҳидаги асарлар дунёга келиши табиий. Аксинча, бу оқимларнинг усусиятларидан ижодий фойдаланилса, улардаги бадиийлик мезонлари миллийлик билан уйғунлаширилса бетакрор бадиий асар дунёга келади. Мазкур мақолада ХХI аср дастлабки ўнйиллигида Эрон ёзувчиларининг романларида постмодерн йўналишига хос белгиларнинг намоён бўлиши сабаблари ва омиллари таҳлил этилади.