ISLOM ZIYOSI

O‘zbekiston xalqaro islomshunoslik akademiyasining «Islom ziyosi» nomli ilmiy jurnali O‘zbekiston Respublikasi Vazirlar Mahkamasi huzuridagi Oliy attestatsiya komissiyasining tarix, islomshunoslik, falsafa va filologiya yo‘nalishlari bo‘yicha eʼlon qilingan maqolalar inobatga olinuvchi nashrlar ro‘yxatiga kiritilgan.

Hajmiga ko‘ra, yil mobaynida saksonga yaqin maqola eʼlon qilinuvchi ushbu nashrning bitta sonida o‘n beshdan yigirma beshtagacha muallif o‘z maqolasi bilan ishtirok etishi mumkin.

“Islom ziyosi” jurnali yilda to‘rt marta nashr etiladi.

Muhim sanalar, ahamiyatga molik tadbirlar munosabati bilan jurnalning maxsus soni yoki bir necha sonlari zarurat yuzasidan qo‘shma son sifatida chop etilishi mumkin.

“Islom ziyosi” O‘zbekiston Milliy kutubxonasi tomonidan ISSN 2181-9939 xalqaro standart seriya raqami bilan ro‘yxatga olingan.

“Islom ziyosi”da “Islomshunoslik”, “Qurʼonshunoslik”, “Islom huquqi”, “Tilshunoslik”, “Dinshunoslikning dolzarb masalalari”, “Millatlararo totuvlik”, “Falsafiy fanlar va psixologiya”, “Filologiya masalalari”, “Jaholatga qarshi maʼrifat”, “Axborot texnologiyalari” va boshqa ruknlar mavjud.

Elektron shakli O‘zbekiston xalqaro islomshunoslik akademiyasining rasmiy iiau.uz veb-saytida eʼlon qilinuvchi jurnalda taʼlim yoki ilmiy muassasa vakillari, mahalliy va xorijiy tashkilot mutaxassislari o‘z materiallari bilan ishtirok etishlari mumkin.

O‘zbekiston xalqaro islomshunoslik akademiyasining rektori “Islom ziyosi” Tahrir kengashining raisi hisoblanadi.

O‘zbekiston xalqaro islom akademiyasining Ilmiy kengashi Qaroriga asosan tashkil etilgan “Islom ziyosi” jurnali mazmun-mundarijasini shakllantirib, kelib tushgan maqolalarni tahrir qiluvchi Tahrir hayʼati aʼzolari akademiyada yoki boshqa muassasalarda xizmat qiluvchi olimlar, ilmiy darajaga va unvonga ega mutaxassislar va muharrirlardan iborat.

Tahrir hayʼatining bitta yoki bir nechta vakilining asosli eʼtiroziga ko‘ra jurnalga jo‘natilgan maqola nashr etilmasligi mumkin.

“Islom ziyosi”da eʼlon qilingan maqolalar uchun mualliflarga qalam haqi to‘lanmaydi. Muallif uchun bepul nusxa ajratish ham ko‘zda tutilmagan.