Тут ипак қуртининг нозематоз касаллиги билан курашиш жуда қийин, чунки касаллик наслдан наслга ўтади. Ипакчиликда энг катта муаммолардан бири – бу самарали профилактика чора-тадбирларини яратиш. Мазкур тадқиқотнинг мақсади тут ипак қурти касалликлари эрта аниқланганда, нозематоз касаллигига янги авлод антибиотиклари таъсирини аниқлаш, организмдаги қўзғатувчи ўсишини тўхтатиш, қурт боқиш жараёнида қуртларнинг нобуд бўлиши ва пилла ҳосилини сақлаб қолишдир. Тадқиқотларда замонавий препаратлар – антибиотикларнинг турли концентрациялари синовдан ўтказилди. Тадқиқотлар турли фазаларда олиб борилди: тут ипак қуртининг қуртлик даврида, баргларга препаратларни пуркаб бериш ва уруғлик даврида, кам зарарланган уруғларга эритмаларда ишлов бериш орқали. Касалланиш даражаси қиёсловчи вариантларга қараганда 33,5 % ни ташкил этган. Қуртлар V ёшнинг дастлабки беш кунида антибиотиклар билан ишлов берилган барг билан боқилиши натижасида зарарланиш экстенсивлиги 9,5-18,0 абсолют фоизга камайгани аниқланди. Энг кўп касалланиш даражасининг пасайиши Синурол 1,2 млн бирл., Синурол 2,4 млн бирл., Метронидазол (750 ва 500 мг), Ципрофлоксацин (250 мг) препаратлари ишлатилган вариантларида 14,0-18,0 абс. фоизлиги кузатилди. Олинган натижалар адабиётдаги маълумотларга тўғри келади, антибиотиклар содда паразит ҳайвонларни нобуд қилиш хусусиятига эга. Ипак қурти нозематоз касаллиги эса шулар жумласига киради.