Республика қишлоқ хўжалигида амалга оширилаётган аграр ислоҳотлар маҳсулот ишлаб чиқариш тармоқларини ривожлантириш билан биргаликда, маҳсулотлар таркибини диверсификациялаш, янги йўналишларни ривожлантириш, аввал эътибордан четда қолган, аммо ҳозирда дунё бозорида талаб ортиб бораётган соҳаларни кенгайтиришни ҳам кўзда тутмоқда. Бунда деҳқон хўжаликлари ва оила томорқа имкониятларидан унумли фойдаланиш катта аҳaмиятга эга. Дунё бозорида талаб юқори бўлган грек ёнғоғининг аҳамиятини ҳисобга олган ҳолда, республикамизнинг лалми ерларидан фойдаланишни рағбатлантириш ва самарадорлигини янада ошириш, ички ва ташқи бозорларда рақобатбардош бўлган грек ёнғоғи ишлаб чиқариш ҳажмини кўпайтиришда замонавий ёнғоқ плантацияларини барпо қилиш ҳамда ёнғоқ етиштириш бўйича илмий асосланган усуллар ва интенсив технологияларни кенг жорий этиш замон талабларидан бири бўлиб қолмоқда. Тадқиқотларимиз давомида, асосан, Паркент туманидаги деҳқон хўжалиги ва оилавий томорқалар ўрганилганда, хонадонлардаги грек ёнғоғи сони 3 минг 612 туп эканлиги аниқланди. Тумандаги деҳқон хўжалиги ва хонадонларда янги грек ёнғоғи навларини жойлаштириш орқали яхши даромад келиши, сарфланган маблағ узоқ вақтгача қайтиб туриши, кам харажат эканлиги сўровнома ўтказилганда айтиб ўтилди. Мақолада деҳқон хўжаликларида грек ёнғоғи етиштиришни ривожлантиришнинг бугунги босқичи хусусиятларидан келиб чиқиб, муҳим йўналишлари бўйича тадқиқотлар натижалари баён этилган.