Chorva hayvonlarining asosiy qismi dehqon xo‘jaliklari va aholi xonadonlarida boqiladi. Ular hayvonlar uchun zarur bo‘lgan makkajo‘xori, beda kabi oziqa ekinlarini o‘zlarining 0,5–3 gektar atrofidagi yer maydonlarida yetishtiradilar. Bunday kichik maydonlardagi texnologik operatsiyalar, ayniqsa, hosilni o‘rish qo‘l kuchi yordamida amalga oshiriladi. Chunki an'anaviy o‘t o‘rish agregatlari kichik dalada sifatsiz ishlaydi, hosilni shikastlaydi va yonilg‘ini ko‘p sarflaydi. Natijada sarf-xarajatlar oshib, dehqonga moliyaviy zarar yetadi. Agar kichik dalalarda kichik o‘t o‘rish agregatlari qo‘llanilsa, bunday salbiy holatlar yuzaga kelmaydi. Buning uchun kichik agregatlarning ishchi parametrlarini asoslashdek dolzarb masalani yechish talab etiladi. TTZ-30C kichik traktor va KOS-2,1 kichik o‘t o‘rgichdan tashkil topgan kichik o‘t o‘rgich agregatining ratsional ishchi tezligi va qamrash kengligini asoslashda traktorlar dinamikasi va mashinatraktor agregatlarini tuzish fanlarining metodologiyalaridan (quvvat balansini hisoblash, agregatning tortishga qarshiligini aniqlash) foydalanildi. Traktorning quvvat balansini tadqiq qilish natijasida uning ilmog‘idagi quvvati va o‘t o‘rgich mashinasining tortishga qarshiligining son qiymatlari (0,4 kW va 1,195 kN) topildi. Bu qiymatlarga 2,1 m ga teng qamrash kengligi va 12,23 km/h ratsional ishchi tezligi to‘g‘ri keladi. Tarkibi TTZ-30C va KOS-2,1 bo‘lgan kichik o‘t o‘rgich agregatini dehqon va tomorqa xo‘jaliklarining kichik yer maydonlarida ishlatish tavsiya etiladi. Mazkur tadqiqotda keltirilgan metodologiyalardan boshqa turdagi texnika vositalarining parametrlarini asoslashda foydalanish mumkin.