O‘ZBEK VA INGLIZ TILLARIDA BINOMIALLARNING SEMANTIK-STRUKTURAVIY XUSUSIYATLARI

Ushbu maqola o‘zbek va ingliz tillaridagi binomial birikmalarni qiyosiy tahlil qilishga bag‘ishlangan. Binomial birikmalar ikki tarkibiy qismdan iborat bo‘lib, ularning birikishi ma’lum bir fonetik, semantik va grammatik qonuniyatlarga asoslanadi. Maqolada ushbu birikmalarning tarkibiy-semantik xususiyatlari, o‘zaro bog‘liqlik darajasi va barqarorlik jihatlari o‘rganiladi. Binomiallar tilning frazeologik tizimida muhim o‘rin tutadi. Ular ko‘pincha xalq hikmatlari va madaniy qadriyatlarni aks ettiradi. Maqolada o‘zbek va ingliz tillaridagi binomiyalarning kelib chiqishi, qo‘llanilish sohalari hamda ular orqali ifodalanuvchi semantik ko‘lam qiyosiy yondashuv orqali tahlil qilingan. Binomiallarning o‘zgarmas tartibda kelishi va ularning ma’nodagi o‘zgarishlari, shuningdek, fonetik qonuniyatlar (masalan, bo‘g‘inlar soni qonuni) va ularning fonologik mosligi alohida o‘rganilgan. Muallif o‘zbek va ingliz tillarida keng tarqalgan binomiyalarni qiyosiy tahlil qilib, ular orasidagi farqlar va o‘xshashliklarni ko‘rsatib bergan. Binomiyalar tarkibidagi komponentlar orasidagi paradigmatik va sintagmatik munosabatlar hamda bu munosabatlarning madaniy va psixolingvistik jihatlari yoritilgan. Maqola lingvistik tadqiqotlarda binomial birikmalarni qiyosiy o‘rganishning amaliy ahamiyatini ta’kidlab, ularning tarjima nazariyasi va o‘qitish jarayonidagi o‘rniga ham e’tibor qaratgan. Xulosa sifatida, binomiyalarning fonetik, semantik va madaniy jihatlari haqida chuqur bilim olish orqali ularni samarali qo‘llash mumkinligi ta’kidlangan.