Respublikamiz tipik boʻz tuproqli hududlarida uzumchilik sohasi agroiqlim sharoitlari va eksport salohiyatidan kelib chiqib jadal rivojlanmoqda. Xususan, yuqori eksportboplikka ega boʻlgan “Kishmish qora” navi sifat va hosildorlik koʻrsatkichlarini oshirish maqsadida ilg’or agrotexnologik yondashuvlarni talab etadi. Soʻnggi yillarda makro va mikrooʻg‘itlar hamda oʻsishni boshqaruvchi moddalarning kompleks qoʻllanilishi uzum hosil elementlariga sezilarli ijobiy ta’sir koʻrsatishi ilmiy jihatdan isbotlanmoqda. Mazkur tadqiqotda Samarqand viloyatining Urgut tumani tipik boʻz tuproqlari sharoitida makro (NPK) va mikroelementlar (mis, rux, marganets) hamda gibberellin moddasining barg orqali qoʻllanilishi “Kishmish qora” navi hosil elementlari, xususan, g‘ujum og‘irligi, qand toʻplanishi, fotosintez faolligi va umumiy hosildorlikka ta’sirini chuqur oʻrganishdan iborat. Tadqiqot natijalari asosida zamonaviy, ekologik, xavfsiz va iqtisodiy samarali agrotexnologik tavsiyalar ishlab chiqiladi. Respublika uzumchiligida xalqaro standartlarga mos intensiv texnologiyalarni joriy etish, eksport hajmini oshirish hamda oziq-ovqat xavfsizligini ta’minlash borasidagi dolzarb masalalarga ilmiy-amaliy yechim taklif qiladi.