Ushbu maqolada yalpizdoshlar (Lamiaceae) oilasiga mansub Gulbandli kiyiko‘t (Ziziphora pedicellata Pazij et Vved) o‘simligining morfologik, bioekologik hamda urug‘ unuvchanlik xususiyatlari o‘rganilgan. O‘simlikning tabiiy tarqalish hududlari, ekologiyasi, shifobaxshlik xususiyatlari va xalq tabobatidagi ahamiyati bayon etilgan. Tadqiqotlar Toshkent davlat agrar universitetining Dorivor o‘simliklar kafedrasi laboratoriyasida amalga oshirilib, urug‘larning unuvchanligi har xil haroratda aniqlangan. Tajribalar natijasiga ko‘ra, kiyiko‘t urug‘larining laboratoriya sharoitidagi optimal unuvchanlik harorati +25°C bo‘lib, unuvchanlik darajasi 92% ni tashkil etdi. +30°C haroratda esa urug‘lar umuman unmagani qayd etildi. Bu holat yuqori haroratning stress ta’siri natijasida urug‘lardagi metabolik jarayonlarning izdan chiqishi bilan izohlanadi.