Maqolada podadan chiqarilgan golshtin zotli sigirlarni go‘sht yo‘nalishidagi naslli buqalar urug‘i bilan chatishtirish natijasida olingan birinchi bo‘g‘in duragay buqachalarning tirik vazni va go‘sht mahsuldorligi bo‘yicha ma’lumotlar keltirilgan. Buqachalarning 16 oyligigacha tirik vazni bo‘yicha ko‘rsatkichlari shuni ko‘rsatdiki, chatishtirish natijasida olingan II guruh (½ aberdin-angus x ½ golshtin); III guruh (½ limuzin x ½ golshtin) va IV guruh (½ sharole x ½ golshtin) birinchi bo‘g‘in duragay buqachalarning tirik vazni I guruh (golshtin zotli) tengqurlariga nisbatan mos ravishda 49,9 kg yoki 10,7% ga (P<0,001), 40,1 kg yoki 8,6% ga (P<0,001) va 31,6 kg yoki 6,8% ga (P<0,001) yuqori bo‘lganligi aniqlandi, bu esa, ularning yuqori tirik vaznga ega bo‘lishi va go‘sht mahsuldorligi shakllanishida bevosita ularning irsiy imkonyatlari va tashqi muhitga moslashuvchanlik hamda buqalarning nasldan-naslga o‘tkazish (prepotentlik) xususiyatlari ham yuqori ekanligidan dalolat beradi. Shuningdek, so‘yim natijalarining asosiy mutloq va nisbiy ko‘rsatkichlari bo‘yicha chatishtirish natijasida olingan II guruh (½ aberdin-angus x ½ golshtin); III guruh (½ limuzin x ½ golshtin) va IV guruh (½ sharole x ½ golshtin) birinchi bo‘g‘in duragay buqachalarda go‘shtning so‘yim og‘irligi bo‘yicha tegishli ravishda 40,4 kg yoki 16,0% ga (P<0,001); 32,7 kg yoki 12,9% ga (P<0,001) va 26,1 kg yoki 10,3% ga (P<0,01) va ularning so‘yim chiqimi birinchi bo‘g‘in duragay buqachalarda 59,2; 58,8 va 58,5% ni tashkil qilib, 3,0; 2,6 va 2,3% ga yuqori bo‘lganligi aniqlandi