RANGBARNGLIKLAR BO‘YICHA JUFTLASHDAN OLINGAN AVLODLAR TERI SATHIDAGI GULLAR NISBATI

Maqolada sur rangli qorako‘l qo‘ylarini rangbarangliklar bo‘yicha turli xil variantlarda juftlashdan olingan olingan avlodlarning teri sathida joylashgan gullarning o‘zaro nisbatini o‘rganish bo‘yicha olingan natijalar keltirilgan. Tadqiqotlarda qimmatli yarimdoira qalamgul shaklidagi gullar salmog‘i ♂kumushsimon x ♀olmos juftlash variantida 44,6±6,16 foizni, ♂olmos x ♀olmos juftlash variantida eng yuqori, ya’ni 47,2±5,88 foizni tashkil etgan. Olmos rangbarangligidagi qo‘chqorlar bilan kumush rangbaranglikdagi sovliqlarni juftlashdan olingan avlodlarda ushbu ko‘rsatkich 45,3±5,36 foizni tashkil etgan. Avlodlar orasida yassi qalamigullar ota-onalarining juftlash variantlariga qarab o‘zgarib borgan, ♂kumushsimon x ♀kumushsimon juftlash variatida eng yuqori ko‘rsatkichni ya’ni 10,9±2,84 foizni tashkil etgan bo‘lsa, eng past ko‘rsatkich ♂kumushsimon x ♀tillasimon juftlash variatida qayd etilgan (8,9%). Umuman olganda yassi gul shakliga ega avlodlar 8,9-11,6% limit oralig‘ida bo‘lgan. Qovurg‘asimon qalamgul shakliga ega gullar 11,1-15,2% atrofida qayd etilgan. Eng yuqori ko‘rsatkich ♂olmos x ♀ kumushsimon, ♀olmos va ♀tillasimon juftlash variantlarida kuzatilgan.