Mazkur maqolada umumta’lim maktablari o‘quvchilarida tadbirkorlik va iqtisodiy tarbiya barqarorligini takomillashtirishning ilmiy-pedagogik asoslari yoritilgan. Tadqiqotning asosiy maqsadi o‘quvchilarda iqtisodiy ong, iqtisodiy tafakkur hamda tadbirkorlik kompetensiyalarini izchil shakllantirishga ta’sir etuvchi omillarni aniqlash va ularning samarali pedagogik mexanizmlarini ishlab chiqishdan iborat. Tadqiqot natijasida o‘quvchilarda iqtisodiy tarbiya barqarorligini ta’minlovchi besh asosiy mexanizm – iqtisodiy-ma’rifiy, amaliy-faoliyatga yo‘naltirilgan, motivatsion-qadriyatli, ijtimoiy-hamkorlik hamda monitoring va refleksiya mexanizmlari aniqlanib, ilmiy jihatdan asoslab berildi. Ushbu mexanizmlar asosida oilaviy tadbirkorlikni ta’lim jarayoniga integratsiyalash orqali o‘quvchilarda tejamkorlik, mas’uliyat, tashabbuskorlik, mustaqil qaror qabul qilish hamda iqtisodiy faollik kabi muhim shaxsiy sifatlarning barqaror rivojlanishi isbotlandi. Maqolada iqtisodiy tarbiyani uzluksiz pedagogik jarayon sifatida tashkil etish, maktab-oila-jamiyat hamkorligini kuchaytirish hamda iqtisodiy bilimlarni real hayotiy faoliyat bilan bog‘lash bo‘yicha ilmiy-amaliy tavsiyalar ishlab chiqildi.