CHET TILINI O‘QITISHDA ZAMONAVIY PEDAGOGIK YONDASHUVLAR

Mazkur maqolada umumta’lim maktablarida chet tillarini o‘qitishda qo‘llanilayotgan zamonaviy pedagogik yondashuvlarning nazariy asoslari va amaliy imkoniyatlari tahlil qilingan. Xususan, kommunikativ, kompetensiyaviy va konstruktivistik yondashuvlarning o‘quvchilarning til kompetensiyasini rivojlantirishdagi o‘rni hamda axborot-kommunikatsiya texnologiyalaridan (AKT) foydalanish samaradorligi o‘rganilgan. Tadqiqot natijalari zamonaviy pedagogik yondashuvlar o‘quvchilarning og‘zaki va yozma nutq ko‘nikmalarini rivojlantirish, mustaqil va tanqidiy fikrlashni shakllantirish, ijodiy faoliyatini rag‘batlantirish hamda o‘quv motivatsiyasini oshirishga xizmat qilishini ko‘rsatdi. Shuningdek, AKT vositalaridan foydalanish ta’lim jarayonini interaktiv, moslashuvchan va shaxsga yo‘naltirilgan tarzda tashkil etish imkonini berishi aniqlandi. Bundan tashqari maqolada aralash ta’lim (blended learning) modeli va raqamli ta’lim resurslaridan samarali foydalanish orqali dars sifati hamda o‘quv natijalarini yaxshilash bo‘yicha ilmiy-amaliy tavsiyalar ishlab chiqilgan. Tadqiqotning amaliy ahamiyati shundaki, unda ingliz tili o‘qituvchilari uchun zamonaviy metod va texnologiyalarni ta’lim amaliyotiga samarali joriy etish yo‘llari yoritilib, chet tillarini o‘qitish metodikasini takomillashtirish hamda o‘quv jarayonining samaradorligini oshirishga xizmat qiluvchi xulosalar taqdim etilgan.