Birinchi tug‘imdagi sigirlarning eksteryer va konstitutsional xususiyatlari

Mazkur maqolada turli seleksiyaga mansub birinchi tug‘imdagi shvits zotli sigirlarning eksteryer va konstitutsional xususiyatlari ilmiy jihatdan o‘rganildi. Tadqiqot Andijon viloyati Asaka tumanidagi naslchilik fermer xo‘jaligida urchitilayotgan Avstriya, Germaniya va AQSH seleksiyasiga mansub sigirlar misolida olib borildi. Tadqiqot davomida hayvonlarning asosiy tana o‘lchamlari, jumladan yag‘rin balandligi, dumg‘aza balandligi, gavdaning qiya uzunligi, ko‘krak chuqurligi va kengligi, tos qismi hamda kaft aylanasi ko‘rsatkichlari aniqlanib, ular asosida tana indekslari hisoblab chiqildi. Olingan natijalar birinchi tug‘imdagi shvits zotli sigirlarning sut yo‘nalishiga xos morfometrik belgilarga ega ekanligini ko‘rsatdi. Ayniqsa, AQSH seleksiyasiga mansub sigirlarda eksteryer ko‘rsatkichlari va tana indekslari Avstriya hamda Germaniya seleksiyasiga mansub tengqurlariga nisbatan yuqoriroq bo‘lib, bu ularning kelgusida yuqori sut mahsuldorligi va naslchilik salohiyatiga ega ekanligini bildiradi.